හරිත පැහැ සොබාදම හැමවිටම නෙතට ප්රිය දසුනකි. මනසට සහනයකි. මිනිසා කෙතෙක් සොබාදම අභියෝගට ලක් කරන්නට වෙර දැරූවද, එය ව්යර්ථ වී යන්නේ එහි භයානක බලපෑම් නැවත පෙරලා එනුයේ මිනිසා වෙතටම බැවිනි. එබැවින් හරිත පැහැ සොබාදම වියැකී යන්නට නොදී, එය රැකගැන්ම, අප සොබාදම වෙත පමණක් නොව අප අප කෙරෙහිම ඉටු කරනා යුතුකමක්ම ය.
මිල්ලනිය ප්රාදේශීය ලේකම් කාර්යාලය විසින් සංවිධානය කරනු ලබන "හුස්ම රකින තුරු මිතුරු" රුක් රෝපණ වැඩසටහන් මාලාවේ තවත් එක් වැඩසටහනක් 2023.12.12 දින පාතකඩ බණ්ඩාර දේවාරාරාම විහාරස්ථාන පරිශ්රයේ දී සාර්ථකව පවත්වන්නට යෙදුනි. ප්රාදේශීය ලේකම් (වැ.බ.) සාරංගි ධීරරත්න මහත්මියගේ හා සහකාර ප්රාදේශීය ලේකම් එරංගි ප්රනාන්දු මහත්මියගේ උපදෙස් මත පරිසර සංවර්ධන නිලධාරී චරුන් ජයශංක මහතා විසින් සංවිධාන කළ මෙම වැඩසටහනෙහි දී විහාරස්ථානයේ භූමි පරිශ්රය තුළ මී, නෙල්ලි, අඹ, රඹුටන්, පේර වැනි පැල වර්ග රාශියක් රෝපණය කරන ලදී.
සහකාර ප්රාදේශීය ලේකම්තුමියගේ ප්රධානත්වයෙන් පැවති මෙම වැඩසටහන සඳහා සංවිධානයෙන් සහ සහභාගිත්වයෙන් සහය ලබා දුන් විහාරස්ථ ස්වාමීන් වහන්සේලා, පරිපාලන ග්රාම නිලධාරී, මිල්ලනිය ප්රජා සෞඛ්ය වෛද්ය නිලධාරීන්, පාතකඩ ග්රාම නිලධාරී, පාතකඩ ආර්ථික සංවර්ධන නිලධාරී ඇතුළු අනෙක් සියලු නිලධාරීන් සහ ග්රාමීය ප්රජාවට බෙහෙවින් ස්තුතිවන්ත වෙමු.
