ශ්රී ලංකාව තුළ පසුගිය කාලසීමාව තුළ ඇති වූ ආර්ථික පසුබෑම හමුවේ වුව ද, ජනතාවගේ අභිලාෂයන් ඉටු කරමින් රාජ්ය සේවය අඛණ්ඩව පවත්වාගෙන යෑම සඳහා රාජ්ය නිලධාරීන් ලබා දුන් දායකත්වය ප්රශංසනීය වේ. එහිදී පසුගිය වසර පුරාවට රජයේ ක්රියාමාර්ග සාර්ථකව දියත් කළ රජයේ නිලධාරීන්, උදා වූ 2024 නව වසරේ ද රජයේ ප්රතිපත්ති ක්රියාදාමයන් හා ඒකාත්මික වෙමින් 2024.01.01 වන සඳුදා දින නව වසරේ රාජකාරි ආරම්භය සිදු කරන ලදී.
ඒ හා සබැඳී රාජකාරි ආරම්භ කිරීමේ නිල උත්සවයන් 2024.01.01 වන දින උදෑසන කාලයේ දී රාජ්ය ආයතන ආශ්රිතව සංවිධානය කර තිබූ අතර බිම් මට්ටමේ ජනතාවගේ සමීපතම රාජ්ය ආයතනයක් ලෙස මිල්ලනිය ප්රාදේශීය ලේකම් කාර්යාලය ද රාජකාරි ආරම්භ කිරීමේ නිල උත්සවය චාම් අයුරින් කාර්යාල පරිශ්රයේ දී පවත්වන්නට යෙදුනි. ආර්ථික සංවර්ධන නිලධාරී ප්රසාදිනී මහත්මිය විසින් මෙහෙයවනු ලැබූ මෙම වැඩසටහන, රාජ්ය පරිපාලන චක්රලේඛ අංක 25/2023 හි උපදෙස් මාලාව අනුව පෙළගස්වා තිබූ අතර, එහි ආරම්භය සනිටුහන් කරමින් මිල්ලනිය සහකාර ප්රාදේශීය ලේකම් එරංගි ප්රනාන්දු මහත්මිය විසින් ජාතික ධජය ඔසවන ලදී. අනතුරුව සියලු නිලධාරීන් විසින් අභිමානවත් ශ්රී ලංකා ජාතික ගීය ගායනා කරනු ලැබීය.
පසුව උත්සවයේ පළමු අදියර සඳහා නිලධාරීන් කාර්යාලයීය පිළිගැනීම් පරිශ්රය වෙත එක්රැස් විය. ගරුතර ස්වාමීන් වහන්සේලා විසින් තුණුරුවන්ගේ ආශිර්වාදය පතා පිරිස පංචශීලයෙහි පිහිටවනු ලැබූ අතර උදා වූ වසර වෙනුවෙන් සුබ ප්රාර්ථනා එක් කරමින් ද ධර්මානුකූල උපදේශනයන් ලබා දෙමින් ද කෙටි අනුශාසනාවක් ඉදිරිපත් කරන ලදී. ඉන්පසු නව වසර සෞභාග්යමත් වසරක් වේවායි ප්රාර්ථනා කරමින්, ගෞරවණීය ස්වාමීන් වහන්සේලාගේ පිරිත් සජ්ඣායනා මධ්යයේ කිරි ඉතිර වීම සිදු කෙරුණි.
මීලඟට එළඹියේ උත්සවයේ දෙවන අදියරයි. ඒ සඳහා කාර්යාලයීය ශ්රවණාගාරය වෙත පැමිණි නිලධාරීන් රට වෙනුවෙන් දිවිපිදූ රණවිරුවන් හා මිය ගිය කාර්යාලයීය නිලධාරීන් ස්මරණය වෙනුවෙන් විනාඩි 02 ක නිශ්ෂබ්දතාවක් පළ කළහ. අනතුරුව තම දකුණත ඉදිරියට ඔසවාගත් නිලධාරීන්, ග්රාම නිලධාරී දිමුතු මහතා විසින් සභාගත කළ 2024 රාජ්ය නිලධාරී ප්රතිඥාව හඬ නගා ප්රකාශ කරමින්, 2024 වර්ෂයේ රජ්ය ප්රතිපත්ති හා අරමුණු ක්රියාත්මක කිරීමට තමා වෙත පැවරෙන කාර්යභාරය කාර්යක්ෂමව හා අවංකව සිදු කිරීම උදෙසා ප්රතිඥා දෙනු ලැබීය. පසුව වත්මන් අභියෝග ජයගැන්ම සඳහා රජය දියත් කරනු ලබන වැඩපිළිවෙළ පිළිබඳවත්, පුද්ගල අභිප්රේරණය පිළිබඳවත් සහකාර ප්රාදේශීය ලේකම් එරංගි ප්රනාන්දු මහත්මිය හා සංවර්ධන නිලධාරී චතුර්ධ ඉසාරංග මහතා විසින් කෙටි දේශනයන් පවත්වන ලදී.
උත්සවයට සමගාමීව කාර්යාල පරිශ්රය තුළ රුක් රෝපණයක් ද සංවිධානය කර තිබූ අතර සහකාර ප්රාදේශීය ලේකම්තුමිය, ගණකාධිකාරිතුමිය හා සැලසුම් අධ්යක්ෂතුමන් ඇතුළු මාණ්ඩලික හා අනෙක් නිලධාරීන්ගේ සහභාගිත්වයෙන් ඖෂධීය නෙල්ලි පැලයක් රෝපණය කරන ලදී.
උදා වූ නව වසර ඔබටත් ඔබේ නිවැසියන්ටත් සෞභාග්යමත් නීරෝගිමත් නව වසරක් වේවා!
