பிரதேச செயலகம் - மில்லனிய

සැප්තැම්බරය, සාහිත්‍ය මාසයයි. විශේෂයෙන් මෙම මාසයේ දී, සාහිත්‍ය හා කලා රසය ඉස්මතු කිරීමෙහිලා විවිධ වැඩසටහන් රට පුරා සංවිධානය කරනු ලබන අතර, එහි ප්‍රධානතම වැඩසටහන ලෙස ජාතික සාහිත්‍ය කලා මහෝත්සව දැක්විය හැක.

සංස්කෘතික කටයුතු දෙපාර්තමේන්තුව මගින් සංවිධානය කරනු ලබන ජාතික සාහිත්‍ය කලා මහෝත්සවයට සමගාමීව, මිල්ලනිය ප්‍රාදේශීය ලේකම් කාර්යාලය හා මිල්ලනිය ප්‍රාදේශීය සංස්කෘතික බල මණ්ඩලය එක්ව සංවිධානය කරනු ලබන රයිගම් කෝරළාභිමානී ප්‍රාදේශීය සාහිත්‍ය කලා මහෝත්සවය, 2024.10.09 වන දින මිල්ලනිය ප්‍රාදේශීය ලේකම් කාර්යාලයීය ශ්‍රවණාගාරයේ දී අති උත්කර්ෂවත් අන්දමින් පවත්වන ලද්දේ, මිල්ලනිය ප්‍රාදේශීය ලේකම් එරංගි ප්‍රනාන්දු මහත්මියගේ ප්‍රධානත්වයෙනි.

මිල්ලනිය ප්‍රාදේශීය ශාසනාරක්ෂක මණ්ඩලයේ ගරු ලේඛකාධිකාරී පූජ්‍ය කල්ලංචියේ පියරතන ස්වාමීන් වහන්සේගේ අශිර්වාදය මධ්‍යයේ ආරම්භ වූ සාහිත්‍යය මහෝත්සවයේ ආරාධිත දේශනය සිදු කරන ලද්දේ කැලණිය විශ්වවිද්‍යාලයේ ජන සංනිවේදන අධ්‍යයන අංශයේ ජ්‍යේෂ්ඨ කථිකාචාර්ය, සමන් රාජපක්ෂ මහතා විසිනි. කලා ක්ෂේත්‍රයට මහඟු දායකත්වයක් දැක්වූ, මිල්ලනිය ප්‍රාදේශීය ලේකම් කොට්ඨාසයේ ප්‍රවීණ කලාකරුවන් පස් දෙනෙක් සදහා, අංශ පහක් යටතේ, රයිගම් කෝරළාභිමාණී සම්මානය ප්‍රදානය කිරීම මෙහි සුවිශේෂම අංගයක් විය. ඒ අනුව ලේඛන කලාව අංශයෙන් සමන් පාලිත ගමගේ මහතා ද, චිත්‍ර කලා අංශයෙන් ජේ. තිලකරත්න මහතා ද, නර්තන අංශයෙන් කාංචන ලක්මාල් මහතා ද, මූර්ති හා කැටයම් ශිල්ප අංශයෙන් ජානක ප්‍රියන්ජිත් මහතා ද, සංගීතය අංශයෙන් රංජිත් ලීලාරත්න හෙට්ටිආරච්චි මහතා ද සම්මානයට පාත්‍ර විය.

තවද ඕඩිය නර්තන උළෙල ජයගත් නර්තන ශිල්පීන් විශේෂ ඇගයීමට ලක් කිරීමත්, ප්‍රාදේශීය සාහිත්‍ය තරඟ ජයග්‍රහණය කළ දරුවන්හට ත්‍යාග හා සහතිකපත්‍ර ප්‍රදානය කිරීමත් සිදු විය. නලීන් චන්ද්‍රකුමාර මහතා විසින් මෙහෙයවනු ලැබූ මෙම සාහිත්‍ය මහෝත්සව තව තවත් වර්ණවත් කරමින් කොට්ඨාසයේ කලායතන වන "ජිත් රූ", "සම්පත්", "නයන සංඛ"හා "හෙල හටන් ශිල්ප" යන කලායතන විසින් සොඳුරු නර්තනාංග ඉදිරිපත් කරන ලදී.

 සංවිධානයෙන් හා සහභාගිත්වයෙන් සහය දුන් සැමට ස්තූතිවන්ත වෙමු!

මූල්‍යකරණය, ව්‍යාපාරයක යහපැවැත්ම සඳහා ව්‍යවසායකයෙකුට අතිශය වැදගත් දැනුම් ක්ෂේත්‍රයකි. මූලික වශයෙන් ව්‍යාපාරක් තුළ ආදායම් වියදම් හැසිරවීම හා මූල්‍ය පරිපාලනය උදෙසා වැදගත් වන මෙම දැනුම, වෙළඳපොල තුළ ව්‍යාපාර පරිසරය අවබෝධය කර ගැනිම, ව්‍යාපාරයක අනාගතය පුරෝකථනය, නව ව්‍යාපාරික අවස්ථා ගවේශණය, ව්‍යාපාරයක ලාභය ඉහළ නැංවීම ආදී  පැතිකඩයන් සඳහා ද අතිශය වැදගත් වන්නකි.

මිල්ලනිය ප්‍රාදේශීය ලේකම් කොට්ඨාසයේ, හොඳම ව්‍යවසායකයා තේරීමේ "ව්‍යවසාභීමානී 2024" තරඟාවලියට සමගාමීව, කොට්ඨාසයේ ව්‍යවසායකයින් වෙනුවෙන් සංවිධානය කළ "ව්‍යාපාර කළමනාකරණය" පිළිබඳ දැනුවත් කිරීමේ වැඩමුළුවක්, 2024.10.07 වන දින සමෘද්ධි කලාප මට්ටමින් සාර්ථකව පවත්වන්නට යෙදුණි. මිල්ලනිය හා හල්තොට සමෘද්ධි කලාපවල ව්‍යවසායකයින් වෙනුවෙන්, මිල්ලනිය ප්‍රාදේශීය ලේකම් කාර්යාලයීය ශ්‍රවණාගාරයේ දී ද, ගල්පාත සමෘද්ධි කලාපයේ ව්‍යවසායකයින් වෙනුවෙන්, ගල්පාත සමෘද්ධි ප්‍රජා මූල බැංකු පරිශ්‍රයේ ද පවත්වන්නට යෙදුනු මෙම වැඩමුළුව සංවිධානය කරනු ලැබුවේ, මිල්ලනිය ප්‍රාදේශීය ලේකම් කාර්යාලයේ කුඩා ව්‍යාපාර අංශයයි.

ව්‍යාපාර මූල්‍යකරණය පිළිබඳ ක්ෂේත්‍රයේ ප්‍රවීණ ආයතනයක් වන, ශ්‍රී ලංකා ගිණුම්කරණ ශිල්පීය ආයතනයේ (AAT) සම්පත්දායකත්වය මත පැවැත් වූ මෙම වැඩමුළුව සඳහා, එම ආයතනයේ සභාපති වසන්ත මහතා ප්‍රමුඛ නිලධාරී මණ්ඩලය සහභාගී විය. භාණ්ඩයක නිශ්පාදන පිරිවැය ගණනය කිරීම, භාණ්ඩයක මිල නියම කිරීම, මුදල් පොත සැකසීම ආදී ව්‍යාපාර මූල්‍යකරණය විෂය හා සබැඳි වැදගත් පැතිකඩයන් පිළිබඳව ව්‍යවසායකයින් මනාව දැනුවත් කිරීම් මෙහිදී සිදු විය.

සංවිධානයෙන්, සම්පත්දායකත්වයෙන් හා සහභාගීත්වයෙන් සහය දුන් සැමට ස්තූතිවන්ත වෙමු!

මිල්ලනිය ප්‍රාදේශීය ලේකම් කොට්ඨාසයේ, හොඳම ව්‍යවසායකයා තේරීමේ "ව්‍යවසාභීමානී 2024" තරඟාවලියට ඔබ සැමට ආරාධනා!

"වයස යනු හුදෙක්ම ඉලක්කමක් පමණි".
මෙම වැකිය සපථ කරමින්, ගතින් වියපත් වූවත් සිතින් තරුණ කලාකාමි වැඩිහිටියන්ගේ දස්කම් විදහා දැක්වීම වෙනුවෙන්, මිල්ලනිය ප්‍රාදේශීය ලේකම් කාර්යාලයේ සමාජසේවා අංශය සහ මිල්ලනිය ප්‍රාදේශීය වැඩිහිටි බල මණ්ඩලය එක්ව සංවිධානය කරන ලද "දෙටු පුරවැසි රඟ සොබා - 2024" ජ්‍යෙෂ්ඨ පුරවැසි දක්ෂතා දැක්වීමේ වැඩසටහන, 2024.10.22 දින මිල්ලනිය ප්‍රාදේශීය ලේකම් කාර්යාලයීය ශ්‍රවණාගාරයේ දී අති උත්කර්ෂවත් අන්දමින් පවත්වන ලදී.

උත්සවයේ අරාධිතයින් ලෙස බස්නාහිර පළාත් සමාජ සේවා දෙපාර්තමේන්තුවේ අධ්‍යක්ෂ සෙව්වන්දි හෙට්ටිආරච්චි මහත්මිය, මිල්ලනිය ප්‍රාදේශීය ලේකම් එරංගි ප්‍රනාන්දු මහත්මිය, සහකාර අධ්‍යක්ෂ (සැලසුම්) පුෂ්පකුමාර එල්ලාවල මහතා, ජ්‍යෙෂ්ඨ සමාජ සේවා නිලධාරී නෙලූපානි කළුබෝවිල මෙනෙවිය, ජ්‍යෙෂ්ඨ සමාජ සේවා නිලධාරී මංගල අශෝක මහතා සහ මිල්ලනිය සිංහ සාමාජයේ සරත් සූරියආරච්චි මහතා සහභාගී විය.

කොට්ඨාසයේ ග්‍රාමීය වැඩිහිටි කමිටු 44හි සාමාජිකයින්ගේ විශේෂාංග රැසකින් සමන්විත වූ මේ හෝරා කිහිපය සාම්ප්‍රදායික නර්තනාංග, නිර්මාණාත්මක නර්තනාංග, ගීත ගායන, විරිඳු ගායන ආදී අංග රැසකින් සමන්විත වූහ. දිවා ආහාරය සහ ත්‍යාග ප්‍රදනය සඳහා දායකත්වය ලබා දෙනු ලැබුවේ හොරණ වාසනා බේකර්ස් ආයතනය හා හොරණ ඌෂා ආයතනයයි.

කොට්ඨාසයේ කලාකාමී වැඩිහිටියන්ගේ දස්කම් විදහා දැක්වීම වෙනුවෙන් අත්වැල් බැඳගත් සියලු දෙනා වෙත ගෞරවණීය ස්තූතිය පුද කරමු.

ආදරණීය වැඩිහිටියනි, ආයු බොහෝ වේවා! නිදුක් නිරෝගී වේවා! කලාකාමී සිත් සතුටින් පිරි ඉතිරේවා!

පශු සම්පත පාලනය, කර්මාන්තයක් ලෙස ගත් කළ, ඉතා දිගු ඉතිහාසයක් පවතින කර්මාන්තයකි. කෘෂිකර්මාන්තය මූලික කරගත් දේශිය ජන ජීවිතය, ඒ හා සබැඳි පශු සම්පත පාලනයට ද නිතැතින්ම යොමු වී තිබුණි. අද වන විට නිරෝගී ජන ජීවිතය සඳහා අවැසි සත්ත්ව ප්‍රෝටීන ලබා දෙමින්, ග්‍රාමීය ආර්ථිකය නගා සිටුවමින් හා ආහාර සුරක්ෂිතතාවයට දායක වෙමින්, පශු සම්පත් පාලනය දේශිය ආර්ථිකය තුළ වැදගත් ස්ථානයක් හිමි කර ගෙන සිටියි.

පශු සම්පත් පාලනය පිළිබඳ ප්‍රජාවගේ දැනුම ඉහළ නංවමින් හා ඒ සඳහා ප්‍රජාව යොමු කිරීම අරමුණු කරගත් දැනුවත් කිරීම් වැඩසටහනක්, 2024.10.10 වන දින, පෙතිගමුව බෝධිගල ප්‍රජා ශාලාවේ දී සාර්ථකව පවත්වන්නට යෙදුනේ, 653/B පෙතිගමුව උතුර ග්‍රාම නිලධාරී වසමේ පශු සම්පත් පාලනයෙහි නිරතව සිටින හා නිරත වීමට බලාපොරොත්තු වන ප්‍රජාව මූලික කර ගනිමිනි.

653/ B පෙතිගමුව උතුර ග්‍රාම නිලධාරී අමිලා ඉරෝශනී මහත්මිය හා ආර්ථික සංවර්ධන නිලධාරී කිත්සිරි කලුබෝවිල මහතා විසින් සංවිධානය කළ මෙම වැඩසටහන සඳහා, කෘෂිකර්ම සංවර්ධන නිලධාරී ලසික එරන්ද මහතාගේ සම්බන්ධීකරණය මත, සම්පත් දායකත්වය ලබා දෙනු ලැබුවේ, මිල්ලනිය පශු වෛද්‍ය නිලධාරී බී.ආර්. අලහප්පෙරුම මහත්මිය හා මිල්ලනිය සත්ත්ව සංවර්ධන උපදේශන නිලධාරී වොලියා විතාන මහත්මිය විසිනි. එහිදී පශු සම්පත් පාලනය ආරම්භ කිරීම, සතුන් තොරා ගැනීම, කූඩූ සැකසීම, ආහාර සැකසීම, රෝග පාලනය, අතුරු නිශ්පාදන සිදු කිරීම, නව තාක්ෂණය මුසු කිරීම ආදී විෂය පැතිකඩ පිළිබඳව දීර්ඝව පැහැදිලි කිරීම සිදු විය.

සංවිධානයෙන් හා සහභාගිත්වයෙන් සහය දුන් සැමට ස්තූතිවන්ත වෙමු!