Divisional Secretariat - Millaniya

ප්‍රධාන ගොඩනැගිල්ලෙන් ශ්‍රවණාගාරය වෙත පිවිසීම සඳහා සුපුරුදු දොරටුවෙන් ඇතුල් වූව ද වෙනදා සුපුරුදු තරප්පු පෙල එහි නොවීය. තුරුලතා ගැවසුනු ගල්ලෙනකින් එය වැසී ගොසින් ය. ගල්ලෙන ආලෝකවත් කරන පහන් එළි දිගේ ශාලාව වෙත පිවිසියෙමි. වේදිකාව පැරැණි මැටි නිවසක එළිපත්තකි. එහි එක් පසෙකින් වී බිස්සකි. වේදිකා පාමුල ඇති දඬු වැට කෙළවර පහන් පැලකි. පහන් සිළුව සුළං සමඟ රඟ දෙද්දී එළිපත්තේ වාඩි වී සර්පිනා තබ්ලා වයන වාදක මඩුල්ලේ තාලයට වැඩිහිටි ඇත්තෝ රඟ දෙති. ගී ගයති. වේදිකාව ඉදිරියේ පැදුරු මත සිටි පුංචි පැටවුන් තම අත්තම්මාගේ ආතාගේ හපන්කම් බල බල අත්පුඩි තලති. මේ මිල්ලනිය පැදුරු සාජ්ජයයි. ආදරණීය වැඩිහිටියන්ගේ රසවින්දනය උදෙසා මිල්ලනිය ප්‍රාදේශීය මහ ලේකම් කාර්යාල පියස වර්ණවත් වූ පැදුරු සාජ්ජයයි.

සමාජසේවා දෙපාර්තමේන්තුවෙන් සපයනු ලබන මූල්‍ය ප්‍රතිපාදන මත ප්‍රදේශයේ වැඩිහිටියන්ගේ දස්කම් විදහා දැක්වීමටත් ඔවුන්ගේ රසවින්දනය සඳහාත් පැදුරු සාජ්ජයක් පැවැත්වීමට මිල්ලනිය ප්‍රාදේශීය ලේකම් කාර්යාලයීය සාමාජසේවා අංශය යෝජනාවක් ගෙන ආවේ සමස්ත කාර්යාලයටම අපූරු ප්‍රබෝධයක් ගෙන එමිනි. එදින පටන්ම කොට්ඨාසයේ වැඩිහිටි කමිටු සාමාජිකයින් එක්රැස් කර ඔවුන්ගේ ගීත පුහුණු කරමින් ද, අනෙක් ගීත සඳහා තමන් පුහුණු වෙමින් ද, පරිශ්‍රය සහ වේදීකා පසුබිම් නිර්මාණය කරමින් ද මිල්ලනිය ප්‍රාදේශීය ලේකම් කාර්යාලයීය නිලධාරීන් සූදානම් වූයේ එය තමන්ගේම කලා මංගල්‍යයක් ලෙස සලකමිනි. වැඩිහිටියන්ගේ තාරුණ්‍ය රසවත් කළ මනරම් නූර්ති ගීත, නාඩගම් ගීත, වේදිකා නාට්‍ය ගීත, චිත්‍රපට ගීත සහ තවත් ගීත රැසක් පැදුරු සාජ්ජය සඳහා තෝරාගෙන තිබූ අතර ඊට සංගීතය සැපයීම සඳහා කළුතර පොලිස් අභ්‍යාස විද්‍යාලයේ පෙරදිග තූර්ය වාදන අංශ නිලධාරීන් සතුටින් කැමැත්ත පළ කළහ.

මෙලෙස සංවිධානය වූ පැදුරු සාජ්ජය 2023.12.22 දින සවස් යාමේ කාර්යාලයීය ශ්‍රවණාගාරයේ දී වේදිකාගත වූයේ ප්‍රවීණ රංගධර ජනක් ප්‍රේමලාල් මහතා සහ කළුතර දිස්ත්‍රික්කයේ අතිරේක දිස්ත්‍රික් ලේකම් (ඉඩම්) සමන්තිකා පී. ලියනගේ මහත්මිය ප්‍රධානත්වයෙනි. මිල්ලනිය ප්‍රාදේශීය ලේකම් (වැ.බ.) සාරංගි ධීරරත්න මහත්මිය ප්‍රමුඛ ප්‍රාදේශීය ලේකම්වරු, මිල්ලනිය සහකාර ප්‍රාදේශීය ලේකම් එරංගි ප්‍රනාන්දු මහත්මිය ප්‍රමුඛ සහකාර ප්‍රාදේශීය ලේකම්වරු, තවත් මාණ්ඩලික නිලධාරීන්, කොට්ඨාසයේ රාජ්‍ය ආයතන, පාසල්, පොලිස් ස්ථාන, සිංහ සමාජය, ව්‍යාපාරික ප්‍රජාව, වැඩිහිටි බලමණ්ඩලය, වැඩිහිටි කමිටු නියෝජනය කරමින් ආරධිතයින් රැසක් ද කාර්යාලයීය නිලධාරීන් සහ කොට්ඨාසයේ ජනතාව ද මේ රසාලිප්ත සන්ධ්‍යාවට සම්බන්ධ විය. ෆේස්බුක් සමාජ මාධ්‍ය හරහා පැදුරු සාජ්ජය සජීවීව නැරඹීමට ද පහසුකම් සපයා තිබුණි.

"මධුර යාමේ සුවඳෙ සාමේ

හිනහ වීලා එන්න රෑ මේ"

ඇත්තට එය මධුර යාමයකි. සිනා පිරි රාත්‍රියකි. ගී ගායනා මැද වැඩිහිටියන් තම තාරුණ්‍යයට නිසැකවම පිය මනින්නට ඇත. ඔවුන් මෙන්ම සමස්ත ප්‍රේක්ෂකාගාරය ද ගී රසින් කුල්මත් වූ බව නොරහසකි. මේ කටයුතු වෙනුවෙන් උපදේශනයෙන්, සහයෝගයෙන් හා සහභාගිත්වයෙන් අත්වැල් බැඳගත් සැමට ගෞරවණීයව ස්තුතිය පුද කරමු!

රැල්ලෙ කිරි වැල්ලේ හාදු දේවී

ජීවනයේ ප්‍රේම මැණික් පෑදේවී.