ප්‍රාදේශීය ලේකම් කාර්යාලය - මිල්ලනිය

පාසල් දරුවන් තුළ අනෙක් ආගම් හා ජාතීන් පිළිබඳ ඇති ගෞරවය වර්ධනය කිරීමත්, අනෙක් ජාතීන්ගේ සංස්කෘතික හා ආගමික සිරිත් විරිත් පිළිබඳ දැනුම වර්ධනය කිරීමත් අරමුණු කර ගනිමින්, අධිකරණ අමාත්‍යාංශයේ, ජාතික සමගිය හා ප්‍රතිසංවිධානය සඳහා වන කාර්යාලයේ ප්‍රතිපාදන මත, මිල්ලනිය ප්‍රාදේශීය ලේකම් කාර්යාලයේ ජාතික ඒකාබද්ධතා අංශය විසින් සංවිධානය කරන ලද "සංහිඳියාවෙන් නව ලොවක්" කලා හා සංස්කෘතික වැඩසටහන, 2024.08.09 වනදා මිල්ලනිය නිව්චැටල් දෙමළ විද්‍යාලයේ දී සාර්ථකව පවත්වන ලදි. මිල්ලනිය ප්‍රාදේශීය ලේකම් එරංගි ප්‍රනාන්දු මැතිණියගේ ප්‍රධානත්වයෙන් පැවති මෙම වැඩසටහනේ දී සිංහල, දමිළ, මුස්ලිම් හා බර්ගර් යන ජාතීන්ට ආවේණික විවිධ උත්සව, නර්තනාංග, ගීත, ආහාරපාන රසවිඳීමට දරුවන්ට අවස්ථාව හිමි විය. ඒ ඒ ජාතීන්ගේ සැරසිලිවලට අනුව හැඩ ගැන් වූ නිවාස හතරක්, දරුවන් විසින් අපූරුවට නිර්මාණය කර තිබූ අතර, ඒ ඒ ජාතීන්ගේ ඇඳුම් පැළඳුම්වලට අනුව දරුවන් සහ ගුරුවරුන් සැරසී සිටියහ.

ප්‍රාදේශීය ලේකම්තුමිය, හොරණ අධ්‍යාපන කලාපයේ දෙමළ මාධ්‍ය සහකාර අධ්‍යාපන අධ්‍යක්ෂ එම්. චන්ද්‍රමෝහන් මහතා, මදුරාවල මහා විද්‍යාලයේ විදුහල්පති අනුර පෙරේරා මහතා සහ දික්හේන දෙමළ විද්‍යාලයේ විදුහල්පතිනි රෙබේකා මලර් මහත්මිය ඇතුළු ආරාධිත අමුත්තන් විද්‍යාල පරිශ්‍රය වෙත පිළිගනු ලැබුවේ, සිංහල සංස්කෘතිය අනුව බුලත් හුරුළු පිලිගන්වමින්, දමිළ සංස්කෘතිය අනුව නළලත පොට්ටු තබමින්, මුස්ලිම් සංස්කෘතිය අනුව සලාතේ නමදිමින් හා බර්ගර් සංස්කෘතිය අනුව අතට අත දෙමිනි.

ඉන් අනතුරුව වැඩසටහනේ සියලු කටයුතු සාර්ථක වේවායි ප්‍රාර්ථනා කරමින්, ආගම් සිහි කිරීම සිදු විය. එහිදී අම්පිටිගල ශ්‍රී සුමංගලාරාමාධිපති පූජ්‍ය හාතියල්වෙල චන්දනන්ද ස්වාමීන් වහන්සේ විසින් බෞද්ධ ආගමානුකූලව ද, හොරණ ශාන්ත මාර්ටින් ද ජෝෂප් දේවස්ථානයේ චාල්ස් රජීව් පියතුමන් විසින් ක්‍රිස්තියානි ආගමානූකූලව ද, කොළඹ අල් මක්කුම් ඉස්ලාමීය දේශක අල්හාලීම් නසාර් මව්ලවීතුමන් ඉස්ලාමීය ආගමානුකූලව ද ආගම සිහි කිරීම සිදු කළ අතර හින්දු චාරිත්‍ර පාසලේ ආචාරීනී කේ. හර්ෂණී මහත්මිය විසින් සිදු කරනු ලැබීය.

ඉන් අනතුරුව ආරාධිත අමුත්තන්, දරුවන් ද කැටුව එක් එක් ජාතීන්ගේ සංස්කෘතිය අනුව සකස් කළ නිවෙස්වලට ගමන් කළහ. සිංහල නිවසට පැමිණි සියල්ලන්ටම අලුත් අවුරුදු චාරිත්‍ර ඉටු කිරීමටත්, කිරිබත් හා කැවුම්, කොකිස් ආදී රස කැවිලි රස බැලීමටත් අවස්ථාව උදා විය. දමිළ නිවසේ දී තෛපොංගල් චාරිත්‍ර ඉටු කිරීමෙන් අනතුරුව සියලු දෙනා වඩේ, තෝසේ, ඉට්ලි ආදී ආහාර රස වින්ඳෝය. ඉන් අනතුරුව මුස්ලිම් නිවසේ දී රටඉඳි, බූන්දි, වටලප්පන් රස වින්ඳේ හජ්ජි උත්සව චාරිත්‍ර ඉටු කිරීමෙන් පසුවය. අවසන් වශයෙන් බර්ගර් නිවසට පැමිණි සියල්ලෝම නත්තල් සීයා සමඟ නත්තල් සමරමින් කේක්, චොක්ලට්, බිස්කට් රස බැලූහ.

වැඩසටහන තවත් රසවත් කරමින් විවිධ සංස්කෘති පිළිබිඹු කරන නර්තනාංග ද පාසල් දරුවන් ඉදිරිපත් කළහ. වැඩසටහන අවසානයේ දී අම්පිටිගල ශ්‍රී සුමංගලාරාමාධිපති පූජ්‍ය හාතියල්වෙල චන්දනන්ද ස්වාමීන් වහන්සේ විසින් පාසලේ පළමු ශේණියේ දරුවන් උදෙසා ත්‍යාග ලබා දුන් සේක. සොඳුරු සිනහවන්, අලුත් අත්දැකීම්, රසබර ආහාරවලින් පිරුණු මේ දිනය, පාසල් දරුවන්ට අමතක නොවන මතකයක් වනු ඇති බවට නිසැකය. මිල්ලනිය ප්‍රාදේශීය ලේකම් එරංගි ප්‍රනාන්දු මහත්මියගේ උපදෙස් මත, මෙම වැඩසටහන සංවිධානයට ශක්තිය ලබා දුන් සංවර්ධන නිලධාරී (ජාතික ඒකාබද්ධතා) රිවිනි වාසනා මහත්මිය හා සංවර්ධන නිලධාරී (වැවිලි ප්‍රජා) ප්‍රසාදි ජයසූරිය මහත්මිය ප්‍රමුඛ ක්ෂේත්‍ර අංශයටත්, නිව්චැට්ල් දෙමිළ විද්‍යාලයේ විදුහල්පති ආර්. ලෝරන්ස් මහතා ඇතුළු ගුරුභවතුන්, දෙමාපියන් හා දරුවන්ටත්, සහභාගීත්වයෙන් දායක වූ ඉංගිරිය ප්‍රාදේශීය ලේකම් කාර්යාලයේ ජාතික ඒකාබද්ධතා නිලධාරී වසන්ත කරුණාරත්න මහතා සහ මිල්ලනිය ප්‍රාදේශීය ලේකම් කාර්යාලයේ නිලධාරීන් සියලු දෙනාටත් බෙහෙවින් ස්තූතිවන්ත වෙමු.